तुझा अंत माझी सुरुवात...

ऋतू येत होते ऋतू जात होते,
तुझ्यासाठी जगता, मी कण कण मरत होते..

मद्याचा घोट, ओठ तुझे घेत होते,
विष त्या थेंबातील मजला जाळत होते..

पिल्लांना भरविण्या घाम मी गाळत होते,
घास ओढूनि त्यांचे, पोट तुझे भरत होते..

शिविगाळ मारहाण तुझी, मी रोजच जगत होते,
भोग पूर्व जन्मीचे म्हणत, नशिबा दोष देत होते..

हरेक क्षणाला, तुझे पाप वाढत होते,
तुझा घडा भरण्याची, मी वाट पहात होते..

बेधुन्द तू, गाडीखाली येता, मी विधवा झाले होते !!
तुझा अंत होता, माझे नवजीवन सुरु झाले होते !!